ABALANDELI bomculi wama-piano uScotts Maphuma bamyalele ukuba azehlise, axolise kubalandeli ngemuva kokufaka i-video yakhe enkundleni yezokuxhumana ebukeka edangele. Lapho ebebhale khona kanje kuTwitter (X): “Nkulunkulu ngiyehluleka, sekungaphezulu kwamandla. Kodwa ngiyazi kawungilahlile. Ngiyindodana yakho, ngiza kuwe,”
Kuzokhumbuleka ukuthi ezinsukwini ezedlule lo mculi ube sematheni ngesikhathi kusabalala ama-video akhe esemcimbini iCotton Fest naseCoyotes Lounge, eMbombela kepha abantu betshengisa ukungamthakaseli. Lokhu kulandela ukugxekwa ngabalandeli ngendlela aziphatha ngayo uma befuna ukushutha izithombe naye.
Engxoxweni aba nayo kwi-podcast kaL-Tido wathi akakuthandisisi ukushutha izithombe nabalandeli. Wathi abantu kumele bakuqonde ukuthi ungumuntu naye akakweleti muntu. “Ngangingafuni ukuba usaziwayo nokuduma. Ngiyathanda ukuba nesikhathi sami, angithandi ukushutha izithombe. Uma ngingafuni ukushutha kusho ukuthi angifuni,” kusho yena. Echaza nokuthi akekho ombeke esicongweni akuso njengamanje futhi akekho ongamsusa.
Ngemuva kwama video nosaziwayo uSomizi Mhlongo ube esejobelela naye wathi amaciko kumele ahloniphe abalandeli, wathi uyohlezi ekuqinisekisa ukuthi akaphambani nabo. “Abalandeli baseNingizimu Afrika bazokutshengisa ukuthi bangobani.”
