UTHEMBISA ukusebenzisa ulwazi aluthole eChina ukuqhubeka nokufukula umkhakha wezobuciko uSabelo Ngema ongomunye wabasunguli besikhungo Ikabawo Performing Academy neqembu lomculo i-Afrosoul.
UNgema uyingxenye yethimba laseNingizimu Afrika eliqokwe iNational Arts Council (NAC) ukucotshelelwa ngolwazi olunzulu ngalo mkhakha ohambisana nezokuvakasha eChina.
Ekhuluma neLANGA uqale ngokubonga ithuba eliyingqayizivele alitholile ukuba abe ngomunye wabaqokwayo ukuyothekelwa ngolwazi eChina.
“Ngibonga uhulumeni wethu waseNingizimu Afrika, i-NAC nohulumeni waseChina ngaleli thuba. Engikubonile eChina kuyamangalisa kakhulu,” kusho uNgema.
Uchaze ezobuciko eChina njengesisezingeni eliphezulu kakhulu uma kuqhathaniswa namanye osekunesikhathi athola inkululeko.
“Engibonile eChina wukuthi basebenzisa nathi izinto esinazo ukuthuthukisa ezobuciko babo njengamasiko, ukudansa, ezeshashalazi nomabonakude.
Konke lokhu nathi sinakho eMzansi kodwa okumele sikwenze wukushintsha indlela yokwenza ukuze nezethu zobuciko zithuthuke futhi zikwazi nokuheha izivakashi kuthuthuke noomkhakha wezokuvakasha,” kusho uNgema ekuveza ukuthi okumqoka wukuthi eNingizimu Afrika kuhlale kukhunjuzwana ngokubaluleka kwalo mkhakha ngoba ungakwazi ukudlala indima emqoka nasemnothweni wezwe.
Uthe ulwazi aluthole eChina lumvule ingqondo ngekusasa lalo mkhakha njengoba efunde lukhule ngazo zonke izindlela zokuthuthukisa ezibuciko.
Uthe nakanjani lolu lwazi aluthole eChina uzolidlulisela kubafundi besikhungo sakhe esikhombisa ukukhula futhi esesiqalile ukukhiqiza ithalente elahlukene kulo mkhakha.
Uveze ukuthi ngaphandle kokulisebenzisa ukuqeqesha abafundi bakhe uzophinde alisebenzise naseqenjini lakhe i-Afrosoul esanda kukhipha ingoma esihloko sithi Ngimtholile.
Le ngoma ye-Afrosoul iphume ngenyanga eyedlule kanti iyatholakala ezinkundleni ezahlukene zomculo futhi nasemsakazweni idlalwa ubuthaphuthaphu.
