Isililo kubhubha amakholwa engozini enyantisayo eMpangeni

BAYISISHIYAGALOLUNYE abazalwane bebandla lamaZayoni ababhubhe engozini enyantisayo emgwaqweni onguthelawayeka uN2 eMpangeni. 

ILANGA lifikile endaweni yesigameko latshelwa ukuthi imoto ebeyilayishe abazalwane iHyndai iveni ingenwe ngemuva yiloli elithwala izimoto ezisuke zinezinkinga (tower truck). Amaphoyisa, abezimo eziphuthumayo nezinye izinhlaka ezihlinzeka ngosizo oluphuthumayo basendaweni yesigameko. 

Iphoyisa lomgwaqo elingagunyaziwe ukukhuluma nabezindaba litshele ILANGA ukuthi lesi sigameko senzeke manje ngezithuba zasekuseni. 

"Sithole ukuthi abazalwane bebesuka enkonzweni yabo eSikhawini sebebuyela emakhaya eDukuduku, eMtubatuba. Umshayeli weloli eshayise iveni yabazalwane uthe ube elele ngesikhathi kwenzeka lesi sigameko. Okwamanje bawu-9 abantu osekuqinisekisiwe ukuthi bashonile kule ngozi," kusho lona.