KUBIKWA ukuthi bebephuma enkonzweni eRichards Bay abantu abayisishiyagalombili ababhubhe engozini yebhasi emgwaqweni onguthelawayeka uN2, phakathi kwaseMandeni naKwaDukuza, namuhla ngeSonto ntambama.
Kuthiwa ibhasi abebehamba ngalo liqhunyelwe yisondo, okube yimbangela yokuthi umshayeli walo engabe esakwazi ukulilawula. Kulesi sigameko kushone abesifazane abayisithupha, owesilisa oyedwa nosana olulodwa.
Phakathi kwezisulu zengozi kubalwa nabane abalaliswe egunjini labagula kakhulu ezibhedlela ezahlukene.
Ihhovisi likaNgqongqoshe wezokuThutha nokuHlaliswa kwabantu KwaZulu-Natal, uMnu Siboniso Duma, likhiphe isitatimende lidlulisa amazwi enduduzo emindenini naseihlotsheni zezisulu.
UDuma uzohambela endaweni yesigameko ngenhloso yokubheka umonakalo nembangela yokwenzeka kwengozi kusasa ngoMsombuluko.
