WEMUKELWE ngenhlokomo uMnu Ebrahim Rasool obeyinxusa lakuleli e-United States of America, ngesikhathi etheleka esikhumulweni sezindiza eCape Town namuhla ngoSonto ekuseni.
URasool ukhonjwe indlela wuhulumeni wakuleliya lizwe njengoba umsola ngokumelana nombuso walo, oholwa nguMnu Donald Trump.
Kubantu abebesesikhumulweni sezindiza kubalwa namalungu e-ANC, aweCosatu, naweMuslim Judicial Council. Amalungu e-ANC abecula, egida, ephethe izingqwembe ezibhalwe amagama okumeseka.
Ekhuluma nabalandeli bakhe, uRasool uthe akazisoli ngezinkulumo zakhe nangezinto abezifaka ezinkundleni zokuxhumana okusolwa wukuthi yizona ezimdalele amazinyo abushelelezi neMelika.
Bunciki-nciki ubudlelwano balawa mazwe njengoba iMelika isola iNingizimu Africa ngokucindezela abamhlophe ngemithetho, nokubungenzi lutho ngokubulawa kwabalimi abamhlophe.
“Bekungeyona inhloso yami ukubuyela ekhaya, kodwa ngibuyela ekhaya ngingenakho nokuncane ukuzisola,” esho.
Uthe akaziboni ephinda ejutshwa ukuyoba yinxusa kwelinye izwe.
