SINYATHELE esikhungweni okugcinwa kusona amagugu nengxenye yomlando wesizwe samaZulu eNgilandi, iSilo uMisuzulu kaZwelithini.
Namuhla iSilo sivakashele esikhungweni iRoyal Welsh and Regimental Museum, eLondon, e-United Kingdom. Ukuvakashela kweMbube kulesi sikhungo kuyingxenye yohambo lwaso nengxenye yabantwana baseNdlunkulu kaZulu njengoba beyizimenywa eziqavile kwelamaNgisi. Bamenywe emcimbini obizwa nge-15th African Achievers Awards. Izicukuthwane ezivela kuleli zilifulathele ngoLwesibili olwedlule njengoba kulindeleke ukuthi zibuye ngalo uLwesibili oluzayo.
Phakathi kwabantwana abayingxenye yohambo kukhona noMntwana Thulani Zulu okhulumela indlunkulu kaZulu. ISilo sithathe lolu hambo nondlunkulu waso omncane uNkz Sihle Mdluli.
Kulesi sikhungo kugcinwe amagugu okubalwa kumwona nemikhonto eyayisentshenziswa ngamabutho kaZulu ngesikhathi itholene phezulu namasosha ombutho wamaNgisi empini yaseSandlwana, eyanqotshwa wuZulu.
