ISILO uMisuzulu kaZwelithini sesivuma okwashiwo nguMntwana waKwaPhindangene, iNkosi Mangosuthu Buthelezi, ngaphambi kokuba akhothame ngo-2023, ukuthi esikhundleni sikasihlalo weNgonyama Trust Board (ITB) kudingeka umuntu oyisazi sezomthetho, hhayi nje noma ngubani.
Sikhuluma ngoLwesihlanu emcimbini Isibaya, obusesigodlweni eMashobeni, KwaNongoma, iSilo sithe sisamqalaza umuntu esizombeka kulesi sikhundla.
UMntwana waKwaPhindangene wakhothama ekhala ngesinqumo seSilo sokuqoka umuntu “ongenawo amagalelo okuhola ibhodi, futhi ongenazo iziqu zomthetho”.
Waphumela obala ephikisa isinqumo seNgonyama uMisuzulu sokuqoka iNkosi Thanduyise kaMpiyezintombi Mzimela wesizwe sasemaZimeleni, eMthunzini, owangena ngemuva kokukhishwa kukaMnu Jerome Ngwenya, owayengusihlalo wale bhodi iminyaka eminingi kusaphila iSilo esebuzayo uGoodwill Zwelithini kaBhekuzulu.
Emuva kwesikhashana, iSilo sayidiliza iNkosi Mzimela kulesi sikhundla, sase sihlala sona.
“Ngingusihlalo weNgonyama Trust. Lokho nina beSilo ngakwenza ngamabomu ngoba ngathatha isinqumo sokuba njengeNgonyama, akekho ongavikela umhlabathi kaZulu ukwedlula mina.
“Nina beSilo, isihlalo lesi sikasihlalo weNgonyama Trust – yebo khona ngifundile kodwa angibufundelanga ubumeli – sidinga umuntu owazi umthetho.
“Sidinga umuntu onguMzulu, ozokwazi ubukhosi, azi usikompilo lwethu singamaZulu,” kusho iSilo.
Siqhube sathi sisamcinga umuntu esizombeka kulesi sikhundla esisaphethwe yisona.
“Ngisaqalaza ukuthi konje ngingabeka bani ngoba maningi amadoda ahlakaniphile KwaZulu, esesinawo manje,” kusho iSilo.
