ISILO uMisuzulu kaZwelithini sesifake amaphepha okwehlukanisa nomunye wamakhosikazi aso, njengoba sithi lo mshado usuwile, ngeke usalungiseka.
Ngokombiko we-African Times, iSilo sifake lawa maphepha eNkantolo ePhakeme yaseMgungundlovu. Ligodliwe igama lale nkosikazi, ukuvikela izingane zayo.
“Ubudlelwano bomshado kammangali (iSilo) nommangalelwa bese bufe kangangoba kalisekho ithemba lokubulungisa. Laba bobabili bebelokhu bebhekana nezinselelo ebudlelwaneni babo, bezama ukuzilungisa, kodwa kungalungi,” kusho ingxenye yencwadi yeSilo efungelwe.
Le ncwadi iqhube yathi baba bobabili bese behlale ngokwehlukana isikhathi esingaphezulu konyaka.
I-African Times ibike nokuthi iSilo, kuwona amaphepha asenkantolo, sizibophezele ukukhokhela izindleko zale nkosikazi, u-R20 000 njalo ngenyanga, kuze kuphele unyaka, kusukela ngosuku okuphasiswa ngalo isicelo saso sokwehlukanisa.
ISilo siveze nokuthi bese behlukaniselene ezinye zezimpahla zabo.
