ISILO samaZulu uMisuzulu kaZwelithini uselihoxisile igama likaMfu Thulasizwe Buthelezi esikhundleni sokuba nguNdunankulu kaZulu.
Ngokwencwadi ILANGA eliyibonile okuthiwa ithunyelelwe amakhosi iSilo simemezele ukuhoxisa igama likaMfu Buthelezi.
Kule ncwadi iSilo siveze ukubaluleka kwalesi sikhundla ukuhlanganisa indlunkulu nesizwe samaZulu.
Sithe okwamanje ngeke sikwazi ukudalula imininingwane ngokuhoxiswa kwegama likaMfu Buthelezi kulesi sikhundla ngenxa yokuthi sisagongqile emphakathini kuze kuphele uJanuary 2025.
Sinxuse ubumbano esizweni ngalesi sikhathi lapho kumele kuqale uhlelo lokuqoka undunankulu kaZulu omusha.
Kuzokhumbuleka ukuthi uMfu Buthelezi uke wabasematheni esanda kuqhoqhobala lesi sikhundla ngesikhathi kunomcimbi waseSandlwana lapho uMnu Siboniso Duma waze wamphuca nombhobho wokukhuluma emsola ngokona umcimbi ngenkulumo yakhe yokwethula iSilo.
Uphinde waba sematheni nangesikhathi kunamakhosi ahamba ayocela iNkosi yakwaButhelezi uZuzifa Buthelezi ukuthi kube nguyena owaxhumanisa neSilo njengoba ayengahambisani noMfu Buthelezi kulesi sikhundla.
