LIGCWELE izinkalo isoka elisolwa ngokushaya libulale intombi yalo, ‘kubangwa ikhadi lempesheni yokugula kwayo’. Umsolwa eligodliwe igama lakhe, usolwa ngokushaya ngetshe uNkz Xolile Shabangu (49) oThobothini, eJozini.
Ngokusho komthombo osondelene nalolu daba, kuvela ukuthi isoka, okungelokuzalwa eManyiseni, eNgwavuma, lafika endaweni lizobamba itoho kwenye yezinkampani eyakha izindlu.
“Lo bhuti wafika lapha endaweni wathandana nalo mama. Lona wesifazane ubesenesikhathi eside ehola impesheni yokugula njengoba ubengumuntu ophila nesifo esithile. Nyanga zonke isoka beliyaye lithathe ikhadi, liyokhipha imali yakhe yempesheni, lithenge elikuthandayo.
“Ngesikhathi sifika endaweni yesigameko, sithole isidumbu sikamufi silengiswe phezulu endlini. Abanye omakhelwane basitshele ukuthi owesilisa ubethatha imali kamufi ayisebenzisele ukuqonywa ngayo ngabanye abantu besifazane.
“Ikhadi lempesheni kamufi litholakale kowesifazane eliqathake kuyena ngesikhathi kwenziwa uphenyo. Isoka libalekile ngoba lesaba ulaka lomphakathi obudiniwe yilesi senzo,” kusho umthombo.
ILANGA lixhumane noMnu Joseph Ngubane, oyilungu leCPF yaseJozini, oveze ukuthi isidumbu sikamufi sitholakale sinezimpawu zokushaywa, maqede salengiswa.
“Okuyizinkomba zokuthi uqale washaywa kube yigazi elibonakele kwenye ingxenye yendlu. Intombazane ethandana nalona wesilisa ithe icela ukugonyuluka lonke iqiniso ngokwenzekile. Kulapho-ke okuvele khona igama lesoka.
“Sinethemba lokuthi amaphoyisa azokwenza uphenyo lwawo oluzoholela ekutheni kuboshwe abathintekayo kulei sigameko,” kusho uNgubane.
Okhulumela amaphoyisa Kwa-Zulu-Natal, uLt-Col Paul Magwaza uthembise ukubuya nezimpendulo kuleli phephandaba ngalolu daba kodwa kuze kwashaya isikhathi sokushicilela engabuyelile.
