THANDI ZONDI
IQEMBU lombaqanga iSoul Brothers lizogubha iminyaka ewu 48 lisemkhakheni wezomculo ngokwenza umjikelezo womculo. Lo mjikelezo uzoqala eMasilela Theatre, eGermiston ngomhlaka-7 kuZibandlela (December) bese udlulela KwaZulu-Natal, eHowick Town Hall, nase Imbizo Conference Hall, eMpangeni.
Leli qembu lasungulwa ngabaculi abahlanu okunguDavid Masondo, uTuza Mthethwa, uZenzele Mchunu, u-American Zulu noMoses Ngwenya. Eminyakeni eyedlule leli qembu like labhekana nezingqinamba zokushona kwabanye balo ngenxa yokugula, nokushonelwa. Phezu kwakho konke lokho uMoses Ngwenya okuwuye kuphela osaphila kubasunguli beqembu uyaqhubeka nokuhola iqembu nokuligcina liphila.
Ekhuluma ngalolu hambo uNgwenya uthe: “ISoul Brothers ihlangane nezingqinamba eziningi kodwa umculo wethu nothando lwabalandeli yilo olusiqhuba phambili. Lo mgubho akuwona owethu kuphela kodwa owabo bonke abantu abebehamba nathi kule ndlela. Ungowokuhlonipha abafowethu abangasekho nomculo wombaqanga osihlanganisayo,” esho.
Njengabaqambi bomculo wombaqanga, iSoul Brothers yejwayele ukubungazwa nezinye izingqalabutho zaseNingizimu Afrika okubalwa kuzo iLadysmith Black Mambazo, uMahlathini and the Mahotella Queens noSteve Kekana ongasekho. Okwenza leli qembu lehluke ngokuthi lingelinye lamaqembu amadala elisaqhubeka nokuqopha, liphinde lenze imijikelezo yomculo. Leli qembu linama album angaphezu kuka 45 .
