UNDUNANKULU waKwaZulu-Natal, uMnu Thami Ntuli uzwakalise ukuba nethemba ngomhlangano kaMengameli waseNingizimu Afrika uMnu Cyril Ramaphosa nowaseMelika uMnu Donald Trump ngokubuya koxhaso lwe-Pepfar lokusiza abantu abanesandulela ngculaza nalabo abanezifo ezithathelana ngokocansi.
UNtuli ubekhuluma emhlanganweni weProvincial Council on Aids obuseMayville, eThekwini izolo ngoLwesithathu lapho ebevula khona lo mhlangano obuhanjelwe ngongqongqoshe abahlukene, izimeya nezinhlaka ezahlukene. UNtuli uthe kuyiqiniso elingeke liphikwe ukuthi isinqumo sikaTrump sokuhoxisa loluxhaso luka-R1.5 Billion ebelixhasa izinhlangano ezisebenza ngalezi zifo sazwela kakhulu njangoba sabe sihambisana nokulahleka kwamathuba emisebenzi.
Uveze ukuthi unethemba lokuthi lo mhlangano kaTrump noRamaphosa obuyizolo ngoLwesithathu uzovuna izithelo ezinhle futhi akuwona owokuqala nowokugcina. Uvumile ukuthi nebala isimo kasisihle neze esifundazweni njengoba sisephezulu isibalo sabantu abahaqekile futhi abangaphansi kohlelo lokuthola imishanguzo. Uqhube ngokuthi nakuba lesi sibalo siphezulu kodwa okunye okukhathazayo yisibalo salabo abahaqekile kodwa abangayidli imishanguzo nalabo asebehaqekile kodwa abangalihloleli leli gciwane. Undunankulu uvumile ukuthi mukhulu umqansa isifundazwe obhekene naso ngalesi sifo.
Nakuba eveze lokhu udalule ukuthi unethemba lokuthi bazokwazi ukuyibamba ishisa, balwe nokusabalala kwalesi sifo bagcine belifezile iphupho lokuqeda ngaso ngo-2030. UNtuli ukhuthaze amalungu nobuholi be-PCA ukuba bakubeke eceleni ukuklwebhana ngodaba lwezikhundla kodwa bagxile empini esemqoka ababhekene nayo yokuqhamuka nemikhankaso nezindlela zokulwa, ukuze bagcine benqobile. Izibalo zakamuva zisaqhubeka nokubeka iKwaZulu-Natal phambili ebantwini abahaqekile ngaleli gciwane nezifo ezisondelene nazo.
