IVULWE ngokwethulwa kwendawo yokungcebeleka ezoba sezingeni i-Africa Travel Indaba eqale ngoLwesibili ngesidlo sasekuseni esihlelwe i-KZN Tourism and Film Authority ehhotela elisanda kukhuza ibuya iHilton Hotel eThekwini.
Le ngqungquthela enkulu yezokuvakasha iheha izinkumbi zabakulo mkhakha abaqhamuka emazweni ahlukene asezwenkazi i-Africa naphesheya kwezilwandle.
Kulesi sidlo ebesihanjelwe uNgqongqoshe wezokuThuthukiswa koMnotho ezokuVakaha nezeMvelo KwaZulu uMnu Musa Zondi nezinye izicukuthwane kwethulwe ngokusemthethweni iClub Med Resort okuyihhotela elisezingeni lomhlaba elizovulwa ngonyaka ozayo eTinley Manor KwaDukuza.
Leli hhotela lingelokuqala eNingizimu Afrika njengoba litholakala emazweni okubalwa kuwo iMauritius, Morocco, Senegal, Sehchelles naseTinisia.
Ekhuluma kulo mcimbi uMnu Chris Di Toit oyisikhulu seClub Med Global uthe babambisene kahle namalungu omphakathi owakhele leli hhotela njengoba iningi labantu abazosebenza kulona kungabantu bendawo.
Uthe sebeqalile ukuqeqesha abantu abawu-60 abazosebenza kulona ikakhulukazi ekhishini njengoba beqeqeshelwa e-Eastern Cape.
Utshele izicukuthwane ukuthi ukwakhiwa kwale ndawo yezokungcebeleka kuzobiza uR2 billion kanti kuzokwakha amathuba emisebenzi awu-800 neminye ezokwakheka eceleni ngenxa yayo ewu-1500.
Udalule ukuthi bahlela ukuvula ngokusemthethweni ngoJune 2026.
UMfu Zondi uwushayele ihlombe umkhakha wezokungcebeleka njengoba usaqhubeka nokudlala indima emqoka ukuthuthukisa umnotho nokwakha amathuba emisebenzi.
Uthe umnyango awuholayo uzibophezele ukusebenza ngokubambisana nazozonke izinhlaka zezokuvakasha ukuqinisekisa ukuthi kuba nokubambisana kuya phambili.
Uveze umnyango awuholayo usezinhlelweni zokuvuselela uhlelo lokwakhiwa kweCable Car ezintabeni zoKhahlamba oluzohlanganisa amazwe amabili okuyiNingizimu Afrika neLesotho kanjalo nezifundazwe ezimbili okuyiKwaZulu Natal neFree State.
“Sibambisene nabo bonke abathintekayo ukuqinisekisa ukuthi lolu hlelo luba impumelelo,” kusho uMfu Zondi oveze ukuthi ukuza kwale ngqungquthela kulesi sifundazwe kuzosithuthukisa ngomnotho ngenani elingaphezulu kuka-R300 million kanti iTheku lona lizohlomula ngaphezulu kuka-R208 million.
