SEZIMKHALELE umsolwa wesifazane osolwa ekubulaweni komshayeli wemoto yakwaBolt ePretoria West ngoLwesithathu ebusuku.
Isigameko sokuklinywa kubulawe lona wesilisa obeshayela kuBolt, okubonakale ebanjwa inkunzi , sishaqise abaningi ezinkundleni zokuxhumana.
Evidweni yesigameko esabelele ezinkundleni, owesifazane ubonakala elekelela owesilisa okusolakala ukuthi bekade behamba naye njengoba bekade bebambisene ekubulaleni umshayeli.
Okhulumela amaphoyisa eGauteng uColonel Mavela Masondo, uthe kulindeke ukuba kuboshwe nabanye njengoba kusaphenywa. Uthe lona wesifazane ongumsolwa oboshiwe uzovela enkantolo yeMantshi e-atteridgeviille ngoMsombuluko.
Uthe isidumbu somshayeli nemoto, kutholakale endaweni yesigameko ePretoria West e-Atteridgeville.
