IGIXABEZWE ngodilikajele neminyaka ewu-30 ngaphezulu inkabi elahlwe yicala lokubulala owesifazane owayegudluzwa ngumnakwabo esithenjini.
ULucky Khishwangaye Mthiyane (37) ubevele eNkantolo eNkulu yaseMthunzini ngoLwesine, lapho egwetshelwe khona amacala amane okungelokubamba inkunzi kuhlonyiwe, elokubulala uNkk Thulisiwe Mthethwa ngomyalelo kaZoliswa Jane Mthethwa owayegane indoda eyodwa nomufi, nelokutholakala nesibhamu nezinhlamvu okwasetshenziswa ngesikhathi kubulawa umufi.
UZoliswa walivuma icala ngasekupheleni konyaka owedlule, waveza ukuthi wagajwa isikhwele nomona ngoba umyeni wakhe wayesechitha isikhathi esiningi nomufi kunaye.
Watshela inkantolo ukuthi wabe eseqasha uMthiyane ngo-R25 000, wamnika nesibhamu ayesebe kwindodana yakhe angayizali ayezosisebenzisa uma esebulala umufi.
Wagwetshwa iminyaka ewu-25.
Enkantolo, ijaji uMahendra Chetty uveze ukuthi uMthiyane uhlulekile ukuhlinzeka inkantolo ngezizathu ezibambekayo, wabe esemgweba iminyaka ewu-15 ngelokubamba inkunzi, udilikajele kwelokubulala newu-15 kwelokutholakala nesibhamu nezinhlamvu.
