INGEBHE kwabadla imishanguzo yokuthithibalisa izifo ezahlukene njengoba kuvela ukuthi iyashoda ezibhedlela nasemitholampilo kahulumeni. Lokhu sekuholele ekutheni uSihlalo we-Action SA KwaZulu-Natal, uMnu Zwakele Mncwango aphumela obala, njengoba egxeka uMnyango wezeMpilo kulesi sifundazwe ukuthi ugembula ngezimpilo zabantu njengoba ungayibeki eqhulwini eyokushoda kwemishanguzo ezibhedlela nasemitholampilo kahulumeni.
“Ungqongqoshe kumele athembeke kubantu. Abantu abasebenzisa imishanguzo okubalwa kuyona eye-BP, TB, neHIV bakhala ngokuthi imishanguzo kabayitholi. UMnyango wezeMpilo ufihla ulwazi olubalulekile emphakathini, abaphathi bezibhedlela bayalazi iqiniso, kodwa kuthiwa iziguli azingatshelwa, zinikwe lokhu okukhona,” esho
Uthi kuthiwa kulindwe ukuqala kukaMbasa (April) okuyisikhathi sokuklazathwa kwebhajethi.
“Into ebuhlungu ngalento wukuthi abantu abasebenzisa imishanguzo yokwelapha i-TB, bazogcina bengenwa i-MDR ngenxa yokungatholi ukwelashwa ngendlela. Kungani amalungu esiShayamthetho ethule noma alinde kuthinteke amalungu emindeni yabo ngaphambi kokuba akhulume? Abantu kabasenawo unembeza, yini le nto ingadingidwa kwikhabhinethi noMnyango woMgcinimafa? Kuyinto engeke ifihlwe ukuthi lo mnyango ubhekene nezinkinga eziningi njengoba nodokotela beshoda bengaqashwa,” esho.
UMncwango uthi akucaci ukuthi lo mnyango uyenzeni imali ngoba kazikho izibhedlela noma imitholampilo eyakhiwe, futhi akukho sobala ukuthi ibhajethi isebenza kuphi. “Imali kanti ishonaphi? Yini bangaboni ukuthi ukushoda kwemithi kusho inhlekelele. Kungani senza ukufa kwabantu ezibhedlela zikahulumeni kube yinto eyejwayelekile,”kubuza yena. Uthe banxusa uNkz Nomagugu Simelane ukuba aphendule ezinsukwini eziwu-7.
ILANGA lishayele uMnyango wezeMpilo KwaZulu-Natal ucele ukuthunyelelwa incwadi ebhalwe nguMncwango ukuze bezophawula ngalolu daba.
