ZIZOTHATHELWA izinyathelo ezinqalai izikhulu zamaphoyisa uma zitholakala zinecala lokulekelela ungqondongqondo wabavukuzi abangekho emthethweni, amaZama Zama ase-Stillfontein, uJames Neo Tshoaeli, owaziwa ngelika-Tiger, ongaziwa ukuthi ukuziphi izinkalo.
Lokhu kuvezwe ngumkhulumeli wamaPhoyisa kuzwelonke uBrig Athlenda Mathe, ngesikhathi ememezela ukuthi amaphoyisa acela ukufuniswa uTiger ongowokudabuka eLesotho.
Uthi ama-record abo aveza ukuthi uTiger waphuma emgodini ngesikhathi kwenziwa utakulo ngeSonto eyedlule kodwa asikho isiteshi samaphoyisa angeniswa kuso futhi akakaze aye esibhedlela eyohlolwa njengamanye amaZama zama.
“Sesiqale uphenyo lokuzama ukuthola izikhulu ezamulekelela ukuba eqe phakathi kwendawo yokuphuma emgodini, i-shaft 11 noms ezitokisini zase maphoyiseni ase-Stilfontein.
Ama-record ethu athi akakaze abhaliswe kuzo zonke iziteshi ezigcine amaZama zama.
UTiger uchazwe njengomunye wabebephethe izintambo belawula konke obekwenzeka emgodini futhi ozakwabo bakhomba tena njengonesandla ekufeni kwalaba abafile njengoba ukudla ebekugcina kuye angabaniki abanye.
Ama-video asemgodini aveza yena ehlukumeza ngokushaya abanye,” kusho uMathe.
Uthi amaphoyisa ase-North West aseqalile ukumthungatha acela nokungenzeka bambone babikele amaphoyisa aseduze.
Uzwakalise ukuphoxeka ngabamulekelele ngokweqa ngemuva komsebenzi onzima wamaphoyisa i-Operation Vala Umgodi eyaqala ngasekupheleni konyaka owedlule.
