Isithombe: nguNhlanhla Gumede
INKINGA yokungaqashwa kodokotela KwaZulu-Natal esekunesikhathi bekhala ngayo odokotela abaduve emakhaya neziqu zabo, ivelile kwisabelomali sanonyaka eSishayamthetho sesifundazwe, ngoLwesibili.
UMnu Francois Rodgers onguNgqongqoshe wezeMali esifundazweni uthi benguhulumeni wesifundazwe akubathokozisi ukuthi kunabantu abaningi abasemkhakheni wezempilo abaswele umsebenzi, ekubeni zidingeka kakhulu izisebenzi zezempilo.
Ngesikhathi ethula isabelomali, uRodgers uveze ukuthi omunye wodokotela abangaqashiwe, uDkt Xoliswa Shangase waseThekwini, unxuse ukuba kwandiswe isabelomali soMnyango wezeMpilo ukuze kuqashwe odokotela, amanesi, osonhlalakahle, nezinye izisebenzi zezempilo, futhi kuthengwe nemithi kanye nezinye izinto ezidingekayo kwezempilo.
URodgers uthe uhulumeni wobumbano lwamaqembu ehlukene, phecelezi iGNU, ungene vele isimo semali singesihle esifundazweni.
Uqhube wathi kodwa bazoqhubeka nokubeka eqhulwini imisebenzi yomphakathi ebaluleke kakhulu, njengezempilo, ezemfundo, nokuthuthukiswa komphakathi.
UMnyango wezeMpilo wabelwe ingxenye ewu-35% wesabelomali sisonke sesifundazwe, esiwu-R158,5 billion. Uthole u-R56,2 billion. Ingxenye yale mali izolekelela ekutheni kuvalwe ezinye izikhala ezivulekile kulo mnyango.
