IBUSISWE ngumholi webandla lamaNazaretha, ohlangothi lwaseBuhleni, iNkosi uMduduzi “Nyazilwezulu” Shembe indawo okuzokwakhiwa kuyona isikhungo sezenhlalakahle eThembeni, eGroutville, KwaDukuza.
Lesi sikhungo sizohlinzeka ngosizo kubantu abathola ukuhlukumezeka ngezindlela ezahlukene, ikakhulukazi izisulu zodlame lwemindeni nokuhlukunyezwa ngokobulili. Lesi sikhungo sizokwakhiwa yiSivananda World Peace Foundation.
ISivananda Foundation kaMnu Ishwa Ramlutchman inomlando omude wokwakha izikhungo zikahulumeni okubalwa kuzona nezikole ezindaweni zasemakhaya nasemalokishini. Inkonzo yokubusiswa kwale ndawo ibihanjelwe ngamalungu aleli bandla, nguNgqongqoshe woMnyango wezokuBusa ngokuBambisana nezoMdabu KwaZulu-Natal, uMfu Thulasizwe Buthelezi nezinye izikhulu zemikhakha eyahlukene.
UNyazi luncome uMnu Ramlutchman ngemisebenzi emihle ayenzela umphakathi.
“Akaqai ukwenza izinto ezinhle. Emathempelini ethu wasakhela amadamu okubhabhathiza. Namanje sinezinhlelo zokwakha indlu yebandla, nakhona lapho usifakile isandla. Inkosi imbusise ube yimpumelelo umsebenzi azowuqala kule ndawo,” kubusisa uNyazi.
