INGASE ibhekane nengalo yomthetho iMeya yaKwaDukuza, uMnu Muzi ‘Ali’ Ngidi.
ILANGA lithole ukuthi amaphoyisa aseMhlali, khona KwaDukuza, aphenya icala lokushaya elivulelwe uNgidi nonogada bakhe abathathu. Leli cala livulwe nguMnu Thami Mdunge oyilungu lomphakathi.
Ekhuluma neLANGA, uMdunge ukuqinisekisile ukuthi nguyena ummangali kulolu daba. Uthe ngomhla ka-26 kuZibandlela (December) nyakenye, wayehamba ngemoto yakhe ngesikhathi beshayelisana kabi nemoto eyayihamba imeya nabaqaphi bayo.
“Mina ngangizitshela ukuthi kuzokhulunyiswana ngoba kayikho imoto eyayilimele, kodwa yona imeya yavele yehla emotweni, yangiqhumisa ngezimpama iphindelela. Nonogada bayo basondela, bangishaya, bethi ngikhuluma ukwedelela kumqashi wabo,” esho.
Ethintwa uNgidi uthe kakukho azokuphawula ngalolu daba. Uqhube wathi kufanele kuxhunywane noMnu Zulu okhulumela uMasipala waKwaDukuza, okuthe uma Ilanga limfonela, ucingo lwakhe lwangabanjwa.
