Zingaphezulu kuka-570 izingane ezizalwe ezibhedlela zaseNingizimu Afrika ngosuku lukaKhisimusi. Nakuba kujatshulelwa ukufika kwemiphefumulo emisha ezweni, izibalo ziveza ukuthi iyakhula inkinga yokukhululelwa kwezingane ezisencane kuleli.
Komama ababelethe ngoKhisimusi, kuthiwa kukhona oneminyaka ewu-13 waseLimpopo, abathathu baseKZN abaneminyaka ewu-15, noyedwa owaseNorth West oneminyaka ewu-16.
Ngokomthetho waseNingizimu Afrika, kuyicala ukuzibandakanya ngokocansi nomuntu oneminyaka engaphansi kuka-16. Kuwuhlobo lokudlwengula olubizwa nge-statutory rape.
Ekhuluma ne-ENCA namuhla ngeSonto ekuseni, uNkz Phinah Kodisang oyisikhulu esiphezulu seSoul City Institute, unxuse ukuba kwandiswe izinhlelo zokufundisa izingane ngezinto ezithinta ucansi ezikoleni, ukuze kugwenywe ukukhulelwa kwazo.
“Kufanele sikhathazeke ngokuthi izinombolo ziyaqhubeka nokwenyuka. Uma kukhulelwa ingane ena-13, yimiphi imibuzo eziyibuza leyo ngane? Uma sesilutholile lolo Lwazi, yiziphi izinyathelo esizithathayo?
“Siphila ezweni lapho imithetho ingaqikelelwa ukuthi isebenza ngendlela ebhalwe ngayo kumthethosisekelo. Inkinga ye-statutory rape ayisukunyelwa ngendlela okumele ngabe isukunyelwa ngayo,” kusho uNkz Kodisang.
