BHEKI NDLOVANA
UMnyango wezaMandla nokuMbiwayo usumemezele ngokusemthethweni uguquko oluzokwenzeka entengweni kaphethiloli nekadizili kusukela ngoLwesithathu lomhla ka-04 kuZibandlela (December).
Kubikwa ukuthi ntengo kaphethiloli izokwenyuka ngo-17c elitheni, kuthi ekadizili yenyuke ngokuphakathi kuka-55c no-56c elitheni, kushiyane ngezinhlobo zawo.
Ekapharafini yona kubikwa ukuthi izokwenyuka ngo-49c elitheni, kuthi eyegesi (liquefied petroleum gas) yenyuke ngo-R1,72 kwikhilogramu.
KHONAMANJALO, lehlile izinga lomkhiqizo wezwe odidiyelwe, iGross Domestic Product (GDP).
Kubikwa ukuthi kwikota yesithathu yalo nyaka, izinga lomkhiqizo wezwe usuhlanganisiwe lehle ngo-0,3%. Lehla nje, ngokota yesibili yonyaka belikade lenyuke ngawo u-0,3%.
Lokhu kuvezwe wumbiko weStats SA owethulwe ngoLwesibili nguMnu Risenga Maluleke, oyiStatistician-General.
Kunezimboni ezine okubikwa ukuthi zibe nomthelela omkhulu kulokhu kwehla kwezinga lomkhiqizo wezwe odidiyelwe. Kulezi zimboni kubalwa imboni yezolimo, okubikwa ukuthi yiyona ebenomthelela omkhulu ongemuhle, bese kulandela imboni yezokuthutha.
Izimboni okubikwa ukuthi zenze kangcono, ngeyezemali (finance industry), ngeyezimayini neyezokukhiqiza (manufacturing).
