BULENGELA eweni ubudlelwano bezakhamizi zamazwe amathathu ngenxa yokwanda kwezigameko zokuntshontshwa kwemfuyo okwenzeka ezindaweni ezigudle imingcele yalawa mazwe.
Sekuyisikhathi eside kukhalwa ngobugebengu bokwebiwa kwezinkomo eMozambique. AbaseSwazini bona bakhala ngokuntshontshelwa izinkomo nezimbuzi. Nabakuleli, engxenyeni egudle umngcele welaseSwazini nelaseMozambique, baveza ukuthi kudala baqala ukuhlaliswa lubhojozi ngabantu abavela ngaphandle, ababantshontshela impahla yasezibayeni zabo.
NgoMsombuluko bekuhlangane izinhlaka zezomthetho eziphuma kulawa mazwe ngenhloso yokubhunga ngekhambi lale nkinga.
“Kunabantu abaphuma kuleli, bangene eSwazini, bethi bayontshontsha izinkomo zeNgonyama Mswati III ngoba iyisigwili. Umbuzo okhona owokuthi noma ngabe uyisigwili uMswati, kufanele yini ukuthi kuntshontshwe impahla yakhe? Okubi wukuthi kwabona labo bantu abenza lokho bagcina sebethatha izinkomo nezimbuzi zabantu.
“Abanye bakuleli bemukela izinto ezintshontshiwe, babuye bazilande bona eMozambique ngoba bethi bafuna ukuthi uhulumeni wakhona ukhulule izimoto zabantu bakuleli, okusolakala ukuthi zidunwa zifakwe ngaphakathi eMozambique,” kusho umthombo obuyingxenye yomhlangano.
UMnu Joseph Ngubane, ongusihlalo wekomidi lezokuphepha eMkhanyakude, uthe sekusungulwe ikomidi elizoba wuhlaka lwezokuxhumana, kusetshenziswane ngenhloso yokuba kutholakale ikhambi kule nkinga. Ikomidi elakhiwe lihlanganisa izikhulu zamaphoyisa aseSwazini, awaseMozambique nawakuleli.
“Muva nje ukubambisana esinakho kuholele ekutheni kutholakale omunye umhlambi wezinkomo okuvele ukuthi untshontshwa ngabathile kulawa mazwe. Okuhle ngenkomo yaseSwazini wukuthi inophawu (lwehawu) okungelula ukulucisha futhi uma sebefikile, belandela izinkomo zabo, bathatha lonke uhlobo lwenkomo abahlangana nalo,” kusho uNgubane.
NGUMNU Joseph Ngubane ongusihlalo wekomidi lezokuphepha eMkhanyakude.
