UZOKWANDA umthwalo kubathengi nakubanikazi bezimoto njengoba izokwenyuka intengo kaphethiloli nekadizili namuhla ngoLwesibili phakathi kwamabili.
Izibalo zeCentral Energy Fund ziveza ukuthi uphethiloli ungase wenyuke ngo-50 cents (93 Octane) no-53 cents (95 Octane) kanti kubhekwe ukuthi udizili wenyuke ngo-82 cents kuya ku-84 cents ilitha.
Lokhu kwenyuka kukaphethiloli kuza ngemuva kwezinyanga ezine zilandelana wehla.
Ngenyanga edlule ugcine wenyuka kancane kunobekulindelekile njengoba kwenyuswe intela kawoyela kuleli, njengokwesiphakamiso sikaNgqongqoshe wezeMali uMnu Enoch Godongwana, ngemuva kokuba kuchithwe eyokwenyuswa kweVAT.
