WETHULE izinhlelo onazo uMasipala weTheku, zokuthuthukisa ezokuvakasha kuleli dolobha. UMnu Cyril Xaba oyiMeya yeTheku uveze lezi zinhlelo emcimbini wokwethulwa kwenyanga yezokuvakasha uMandulo (September), obuwethanyelwe ngosomabhizinisi nezinhlaka ezahlukene emkhakheni wezokuvakasha.
NgokukaXaba, ezokuvakasha zisaqhubeka nokudlala indima emqoka ekuthuthukiseni umnotho nokwakha amathuba emisebenzi. Uthe okubakhuthazayo ngalo mkhakha yizibalo zakamuva ezikhishwe yiSouth African Tourism eziveze ukuthi phakathi kukaMasingana (January) noNhlaba (May) nonyaka, lo masipala uhanjelwe yizivakashi eziqhamuka phesheya kwezilwandle ezibalelwa ku-186 000 neziwu-2,8 million eziqhamuka ezindaweni ezahlukene kuleli.
Uthi inhloso yokubambisana kwabo nosomabhizinisi nezinhlaka ezikwezokuvakasha wukuba kuqhanyukwe namasu okuthuthukisa lo mkhakha nezinhlelo ezintsha zokwenza iTheku libe yindawo yekhethelo kwezokuvakasha. UXaba uqhube ngokuthi okunye okumqoka ngokuhlangana kwabo nosomabhizinisi wukuthola uvo lwabo ngendlela abangabambisana ngayo.
Imenenja yalo masipala, uMnu Musa Mbhele, ithe phakathi kwezinhlelo umasipala onazo wukubheka izindlela zokwakha esinye isikhumulo sezindiza ngasogwini oluseningizimu yalo masipala. UMasipala weTheku ugabe ngesikhumulo sezindiza esibalwa nezinkulu eNingizimu Afrika, iKing Shaka International Airport.
UMbhele uthe okunye okuseqhulwini wukuqhamuka ne-App yezokuphepha ezonikeza izivakashi indlela elula nephephile yokubona izindawo ezingazivakashela eThekwini namaphethelo. Uveze nokuthi lo masipala usanda kwethula uphiko lwamaphoyisa azogxila kwezokuvakasha ezindaweni ezigudle ulwandle.
Uthe lokhu bakwenze ngenhloso yokuqinisa ezokuphepha ukuze izivakashi ezihambela lezi zindawo zizizwe ziphephile. UMbhele unxuse ukuba osomabhizinisi nezinhlaka ezisemkhakheni wezokuvakasha babambe iqhaza engqungqutheleni ezayo ebizwa nge-reSURGEnce Conference, okulindeleke iqale ngomhla ka-20 ize iphothulwe ngomhla ka-24 kwephezulu.
Uthe kule ngqungquthela ezokuvakasha zizobe ziseqhulwini. Kulindeleke ukuba yethanyelwe yizihambeli nezithunywa ezibalelwa ku-150 eziqhamuka emazweni ahlukene okubalwa kuwo ne-United States of America.
“Izoba yithuba elimqoka lokwakha nokuqinisa ubudle-lwano okuzobeka lo mkhakha kwelinye izinga,” esho.
Kuvele ukuthi ezokuvakasha eziqondene nezemidlalo nobumnandi zidlala indima emqoka kulo mkhakha.
