ZISABISA ngokuthi kaluzoba bikho uzinzo kowezemfundo izinyunyana zothisha ezifuna ngodli imali yempesheni okumele ikhokhelwe abafuna ukusheshe bathathe umhlalaphansi.
UMengameli weNational Teacher’s Union (Natu), uMnu Sbusiso Malinga uthi bashaqekile ukuthi kungani iNhloko yoMnyango wezeMfundo KwaZulu-Natal, uMnu Nathi Ngcobo, ikhiphe isekhula ephuma eceleni njengoJosaka, ethi kazikho izicelo ezizokwemukelwa kulaba abafuna ukuthatha impesheni yabo njengamanje, ngoba kayikho imali emnyangweni wezemfundo.
Uthi njengoba uzwelonke usukhiphe isinqumo sokuthi othisha abaphakathi kweminyaka ewu-55 no-59, sebengafaka izicelo zokushesha bathathe umhlalaphansi, kumele kwenzeke lokho.
“Othisha abafake izicelo kumele bayithole imali yabo. Lokho okwenziwa nguNgcobo kusho ukuthi sekungowakhe lo mnyango, ushaya imithetho yakhe ephambene nowezemfundo kuzwelonke. Othisha bayayidinga le mali ukuze bafundise izingane zabo, banwebe imizi yabo. Ngakho-ke, sithi laba abaphoqwa yizimo zokuthi bathathe impesheni, mabalithathe leli thuba,” kusho uMalinga.
Uthi ukungabi khona kwemali, kakubathinti othisha. Uthi isekhula ikuqedile ukwethembana phakathi kwezisebenzi ngemali yazo, eziyibekelwa wuhulumeni.
“Iyephi imali yothisha? Mabahambe bayoyifuna ngoba kasazi ukuthi imali ishonaphi eMnyangweni wezeMfundo KwaZulu-Natal,” esho.
Uthi leli thuba lokuthathwa kwempesheni balithanda ngoba lizovulela amathuba omsebenzi entsheni efundele ubuthishela, engaqashiwe. Uthi bayiphonsela nakuNdunankulu wesifundazwe, uMnu Thami Ntuli, inselelo yokuthi alucubungule lolu daba.
UNobhala weSouth African Democratic Teacher’s Union (Sadtu) KwaZulu-Natal, uNkz Nomarashiya Caluza, uthe kuyabethusa ukuthi kungani umnyango wezemfundo esifundazweni, ungahambisani nesinqumo esithathwe kwikhabhinethi yakuleli zwe.
“Kuyasethusa lokhu ngoba inhloko yomnyango kayikaze ikhulume nezisebenzi, noma nezinyunyana ngaphambi kokuba imemezele isinqumo sokuvalela ngaphandle othisha baKwaZulu-Natal, kuleli thuba elimenyezelwe,” esho.
Uthi izizathu ezibekwe wumnyango wezemfundo zokuthi kukhishwe ngaphandle othisha kulolu hlelo, kaziphatheki. Uthi akukwazi umnyango ukuthi ungaphuma nesinqumo esifana nalesi kungaboniswananga nezinhlaka ezifanele, ezithinta izisebenzi.
Ngesikhathi kuphasiswa lo mthetho, kwavela ukuthi izindleko eziningi zezisebenzi zikahulumeni ezisheshe zithathe umhlalaphansi, zizothwa-lwa yihhovisi likamgcinimfana.
Kwabikwa ukuthi inhloso enkulu yalo, wukonga imali emnyangweni kahulumeni, kuvulwe nezikhala zemisebenzi, kuqashwe abantu abasha (first level entry salary).
