LIVUKWE yisibibithwane lakhala ilungu lephalamende laseSwazini emuva kokuba kugasele amaphoyisa kahulumeni wakuleliya lizwe nomyalelo wokuba amise umcimbi ebeliwuhlelile.
UNkk Nomalungelo LaZwide-Simelane odume ngelikaMkhokheli, ube enomcimbi wokubonga ukwesekwa yizakhamizi zangakubo kaMkhweli, eSiphofaneni. Lo mholi uyinkosikazi kaMnu Mduduzi Simelane osekubhaceni ngemuva kokuba ngonyaka ka-2021 alifulathela elakwaNgwane ngesikhathi kusuka izibhelu, amalungu omphakathi ekhala ngesandla sensimbi esisetshenziswa wuhulumeni weNgonyama uMakhosetive ‘Mswati III’ Dlamini.
Abanye ababehambisana nemibono kaSimelane, okubalwa kubona noMnu Bacede Mabuza, babanjwa ngamaphoyisa, kuze kube yimanje basagqunywe ezitokisini.
Lo mcimbi umiselwe amatende endaweni yebandla lalo mndeni wakwaSimelane. Ngalo lomcimbi lo mholi ubezobonga aphinde adlulise izipho kubantu abadala. Ezinye zezipho bekukhona nezingubo zokulala obekufanele zinikwe abantu abadala ngenhloso yokubasiza njengoba kuyizikhathi zasebusika.
Ingxenye yamalungu omphakathi ivuke indlobane igxeka uhulumeni namaphoyisa. Umphathi-siteshi wamaphoyisa aseSiphofaneni utshele izethameli ukuthi bathole umyalelo wokuba bakuvimbe ukuqhubeka kwalo mcimbi ngoba kawugunyaziwe futhi kawubikwanga ekomkhulu lesizwe.
“Umcimbi wenzelwe endaweni yebandla. Mina angisiboni isidingo sokuthi ubuholi bendabuko buthi abubikelwanga ngomcimbi ngoba wenzele esontweni. Leli sonto lakhonzelwa ngokusemthethweni. Ibuhlungu lento abayenzayo ngoba lokhu kufakazela ukuthi elakwaNgwane kalikhululekile,” kusho ilungu elinye lamalungu omphakathi.
