IMEYA yaseMgeni uMnu Chris Pappas nethimba likamasipala, bahambele indawo yaseMpophomeni, ukuyohlola umonakalo odalwe yimvuma enamandla nesiphepho.
KUYAKHALWA maphakathi neKwaZulu-Natal, ngenxa yezimvula ezinamandla, neziphepho obekuhlasele ngempelasonto. Izifunda ezithintekile, ngesaseMzinyathi nesaseMgungundlovu.
Elokishini iMpophomeni, ngaphansi kukaMasipala uMngeni, eMgungundlovu, kuphephuke inqwaba yezindlu ngoLwesihlanu ebusuku. IMeya yaseMngeni, uMnu Chris Pappas, uchithe usuku lonke lwangoMgqibelo nezisebenzi zikaMasipala, bebheka umonakalo odalekile eMpophomeni. Abanye abantu abaphephukelwe yizindlu kule ndawo, bakhoseliswe emahholo omphakathi.
Endaweni yaseMbulwane, kuMasipala uMvoti (Greytown), eMzinyathi, khona izimvula ezinamandla, nezihambisana nesiphepho, kudale umonakalo ngoba kuguguleke imigwaqo, kwaphephuka nezindlu.
UMnu Themba Ngcobo, oyikhansela lendawo, uthi basizwa yithimba elibhekele izinhlekelele, elijutshwe wuMnyango wezoBusa ngokuBambisana nezoMdabu KwaZulu-Natal, ukutholela izisulu usizo. UNgqongqoshe walo mnyango esifundazweni, uMfundisi uThulasizwe Buthelezi, uthe zingu-182, izindlu eziphephukile nezicekeleke phansi, ezifundeni uMzinyathi noMgungndlovu ngale mpelasonto.
“Siyayixwayisa imiphakathi yakithi ukuthi ingabi wuvanzi, njengoba izangoma zezulu ziqagula ukuthi kusazoba khona ezinye izimvula ezinamandla eziphelezelwa yiziphepho ekuqhubekeni kwesonto. Ithimba lethu elibhekele izihlekelele, sesilikhiphile ukuthi liyosiza izisulu zeziphepho ezihlasele ngempelasonto,” kusho uButhelezi.
