KUSOLWA ukuthi ubeziphindiselela owesilisa odubule abantu abayisikhombisa, kwashona abathathu ngoLwesibili ebusuku eMapulazini, eNanda, eThekwini.
Kubikwa ukuthi ngoLwesibili ebusuku kugasele umsolwa owaziwayo endlini obekuhleli kuyona abahlaselwe, wavulela ngenhlamvu, maqede washaya wachitha.
Ababulewe nguMnu Sphiwe Shezi (25), ngu-Ayabonga Maseko (19) nowesilisa owaziwa ngelikaMthinayi (25). Abane baphuthunyiswa emtholampilo, belimele kanzima.
ILANGA lithole ngemithombo yalo ukuthi kunezinsolo eziqinile zokuthi ukudutshulwa kwalaba, kuhlobene nokuziphindiselela. Umthombo waleli phephandaba, ulihlebele ukuthi umsolwa udubule laba nje, ubesebuya okwesibili kule ndlu abebehleli kuyona laba.
Uveze ukuthi umsolwa ngumuntu owaziwayo endaweni, ufike okokuqala kule ndlu eyofuna imali yakhe.
“Lo mfana owenze le nto, ufike endlini obekuhleli kuyona laba, wafuna imali yakhe. Asazi ukuthi imali yani lena abeyifuna, kodwa laba banqabile nayo, bathi ngeke ayithole. Kube sekusuka ingxabano phakathi kwabo, egcine iholela ekutheni bamshaye kanzima umsolwa.
“Uhambile wayolanda isibhamu, wabuya wavulela ngenhlamvu kubona bonke abebephakathi endlini. Ababili kulaba abashonile, baphuthunyiswe emtholampilo, baphelela khona. Oyedwa ushonele endaweni yesigameko,” kusho umthombo.
Okhulumela amaphoyisa KwaZulu-Natal uCol Robert Netshiunda uthe kuvulwe amacala amathathu okubulaka namane okuzama ukubulala.
