ULAHLWE ngamacala uNgizwe Mchunu – owazakhela udumo engumsakazi woKhozi FM – njengoba iNkantolo eNkulu yaseMgungundlovu imphoqe ukuba ahoxise “izinhlamba” abethuka ngazo uMfundisi uThulasizwe Buthelezi, onguNgqongqoshe wezokuBusa ngokuBambisana nezoMdabu KwaZulu-Natal.
UNgizwe ubebhekene namacala okuhlambalaza uButhelezi okubalwa kuwona ukumethuka ngezinhlamba ezesabekayo esidlangaleni, wamsola nangokuba ngumbulali ofuna ukuqeda ngempilo yakhe.
Inkantolo, ikhipha isinqumo ngoMsombuluko, inqumele uNgizwe izinsuku ezintathu ukuhoxisa izinkulumo zakhe azenza ezinkundleni zokuxhumana, azisuse zonke ekhasini lakhe. Phakathi kwamacala abeshushiswa ngawo, kukhona naleli alenza ngesikhathi kunemibhikisho yomphakathi eVryheid ngoMandulo (September), lapho ethuka khona uButhelezi ezinkundleni zokuxhumana, waze wayohlangana nomphakathi wakuleya ndawo, nakhona washiya angalazi.
Umphakathi wakule ndawo wawukhala ngokuthi umasipala wendawo ucisha ugesiekubeni uhulumeni sewaluvala uhlelo lokucishwa-kongiwa kwawo (load shedding). UButhelezi wanquma ukufaka udaba lokwethukwa kwakhe enkantolo.
Izinkulumo okuthiwa wazenza uNgizwe, ngokwesinqumo senkantolo, uzenze ngoMandulo mhla ka-11, u-25 no-26. Inkampani ephethe iFacebook neTiktok, iMeta Platforms – nayo iphoqiwe ukuba isuse zonke lezi zinkulumo zikaNgizwe ezinkundleni zakhe zokuxhumana.
Inkantolo ikhiphe isinqumo sokuthi zonke izindleko zaleli cala mazikhokhwe nguNgizwe nenkampani iMeta Platforms. Ijaji uPillay lithe uNgizwe makangasaphinde asabalalise izinkulumo ezingamanga, zokuthi uButhelezi ufuna ukumbulala.
UNgizwe utshele ILANGA ukuthi ubengakawatholi amaphepha esinqumo senkantolo.
“Kakukho engikwaziyo mina,” kusho uNgizwe.
UNgizwe uke wahlasela uButhelezi ngenhlamba naphambilini, ethi uxova ubukhosi, kanti nangesikhathi (uButhelezi) eseyimeya kuMasipala wesiFunda iZululand (uNgizwe) ubejwayele umhlasela.
