UFUDUKELA eJabulani, eSoweto, eGauteng umgubho weminyaka ewu-50 kwasungulwa i-IFP eyiqembu lesihlanu ngobukhulu eNingizimu Afrika, njengoba kuhlelwe umcimbi omkhulu kuleli lokishi.
Uzobe uhanjelwe ngabaholi balo kusukela emazikweni, kuyofinyelela kuzwelonke. Ngokwesitatimende esithunyelelwe abezindaba, iNkosi uZuzifa kaMangosuthu Buthelezi – engomunye wabaholi baleli qembu – yiyona ezokwethula inkulumo yosuku. Phakathi kwezinye zezihloko okulindeleke ukuba kukhuluywe ngazo, yiqhaza laleli qembu nomsebenzi eliwenzile maqondana nabantu bakuleli lokishi.
UMnu Velenkosini Hlabisa ongumengameli waleli qembu, naye uzobe eyisikhulumi esibalulekile.
I-IFP yasungulwa ngomhla ka- 21 kuNdasa (March) ku-1975 KwaNzimela, eMelmoth. Yasungulwa yiNkosi uMangosuthu Buthelezi (engasekho).
INkosi uButhelezi yalihola kusukela lisungulwa leli qembu, kwaze kwaba imemezela ukubeka phansi izintambo ngo-2019. I-IFP iyingxenye yamaqembu ahola uhulumeni wobumbano kuzwelonke naKwaZulu-Natal. UHlabisa unguNgqongqoshe wezokuBusa ngokuBambisana nezoMdabu.
KwaZulu-Natal i-IFP yiyona ehola amaqembu ayinhlanganisela, aphethe uhulumeni-okukhona kuwona iDA, yi-ANC neNFP. ILANGA lithole ukuthi abazobe behambele lo mcimbi bazobuye babusiswe ngokudla kwendlebe, njengoba kuzobe kukhona amaciko, azobe eshiyelana inkundla.
