IMINININGWANE yakamuva ikhomba ukuthi izokwenyuka intengo kaphethiloli ngoMasingana (January) wonyaka ozayo.
ICentral Energy Fund (CEF) ishicilele ulwazi olukhomba ukuthi kungenzeka intengo kaphethiloli (petrol 93) yenyuke ngo-11c elitheni, no-3c elitheni (petrol 95).
Ngokusho kweCEF, kungenzeka udizili wehle ngo-3c elitheni, upharafini wona wehle ngo-14c elitheni. Lolu wulwazi olusengaguquka ngenxa yezimo ezahlukene okubalwa kuzona umnyakazo esimweni samandla erandi nentengo yomphongolo kawoyela ongahluziwe ezimakethe zomhlaba.
Isinqumo ngokuzokwenzeka sizomenyezelwa wuMnyango wezaMandla nokuMbiwayo ekupheleni kwenyanga. Imvamisa intengo entsha iqala ukusebenza ngoLwesithathu lokuqala enyangeni.
Kuvela lolu lwazi nje, ekuqaleni kukaZibandlela (December) intengo kaphethiloli yenyuke ngo-17c elitheni, kwathi ekadizili yenyuka ngo-55c no-56c elitheni, kushiyana ngezinhlobo zawo. Ekapharafini yona yenyuke ngo-49c elitheni.
