IVEZE eyombango wemali okwakumele ikhokhelwe inkabi eyabulala, “inkabi” eseyiphenduke ufakazi wombuso ecaleni labashadile bakwaMchunu, uNkk Nomusa Mchunu noMnu Thokozani “Sci” Mchunu. Laba babhekene namacala awu-7, okubalwa kuwo nelokubulala unina wengane kaMchunu, uNkz Noluthando Khomo.
Ufakazi uMnu Sibusiso “Gadaffi” Ndlovu uphothule ukuthula ubufakazi bakhe eNkantolo eNkulu yaseMgungundlovu ngoLwesibili, lapho echaze ngokuhlelwa kwetulo lokubulawa kwenkabi, okuvele kule nkantolo ukuthi yiyo eyabulala uNkz Khomo, uMnu Sanele “Tinky” Ngcobo. UNgcobo owadutshulwa ngo-2018, engaphandle ngebheyili ecaleni lokubulala uNkz Khomo.
UNdlovu utshele inkantolo ukuthi ngemuva kokubulwa kukaNkz Khomo, uNgcobo watshela uSci ukuthi ufuna inkokhelo ka-R250 000.
“USci akakuvumanga lokho, wamtshela ukuthi imali akanayo njengoba ayekhokhela ummeli wakhe (uNgcobo, ecaleni lokubulala uNkz Khomo ayebhekene nalo) futhi amkhokhela nebheyili. Lokhu akubanga kuhle njengoba bagcina bejikijelana ngamagama,” kusho uNdlovu.
Eqhuba, uveze ukuthi kukho lokho kungaboni ngasolinye, uNgcobo waxhumana nephoyisa elaliphethe icala ngaleso sikhathi, wathi ufuna ukuhlambuluka. Uthi lokhu kwafika kuSci, owabe esehlela itulo lokuba kubulawe uNgcobo, owadutshulwa wafa ngoNhlangulana (June) ka-2018.
Ubufakazi obethulwe phambilini kule nkantolo, buveze ukuthi isibhamu esabulala uNgcobo, yisona esabulala uNkz Khomo. Ebufakazi bukaNdlovu, uveze ukuthi uSci waphinde wapheka itulo lokubulala enye inkabi eyaphenduka ufakazi wombuso, yagwetshwa iminyaka ewu-8, uSimiso Jarome Liphenyana.
Uthi sekusondele izinsuku zokubulawa kukaLiphenyana, yena (uNdlovu) wavukwa wunembeza, njengoba babengomakhelwane, wayomthiphisa ngetulo, kwaba wukusinda kwakhe.
UNkz Khomo wabulawa ngo-2018, ethathwe kubo nguNgcobo noLiphenyana, abazibiza ngamaphoyisa. Watholakala edutshulwe wabulawa, indodana yakhe eyayinezinyanga eziwu-3, idutshulwe engalweni, kodwa iphila. UNgcobo noLiphenyana babhadanywa ngamalungu omphakathi sebeyoshisa imoto eyayinesidumbu sikaNkz Khomo nendodana yakhe, eyayisaphila.
ULiphenyana wakwazi ukubaleka, uNgcobo wabanjwa, washaywa kanzima ngaphambi kokuba aboshwe. Laba abashadile baboshwa ngo-2024, ngemuva kokuba iLiphenyana ekhulume “iqiniso”, wagwetshwa.
