UNDUNANKULU waKwaZulu-Natal obuye asingathe uPhiko lokuPhepha koMphakathi (Community Safety), esifundazweni, uMnu Thami Ntuli, ngoLwesibili uhlanganise amehlo nomndeni wekhansela le-ANC elidutshulwe labulawa ngoLwesine.
UKhansela Sibusiso Khwela obehola uWard 17 kuMasipala weTheku, udutshulwe esemahhovisi abesebenzela kuwona eKlaarwater. Kuthiwa udutshulwe ngumuntu ofike wazenza ozocela usizo.
“Okubuhlungu wukuthi uKhansela uKhwela, ubulawe esemsebenzini, enza umsebenzi womphakathi, abezibophezele ekutheni ulethelwe izidingo futhi uthuthukiswe. Asengu-18, amakhansela abulawe komasipala baKwaZulu-Natal, kusukela ngo-2021. Ukhetho lokugcina lohulumeni basekhaya, belungawo lowo nyaka.
“Ukubulawa kwabantu abasebenzela umphakathi ngokuzikhandla, nangokwethembeka, yinto esiyithatha njengehlazo siwuhulumeni,” kusho isitatimende sikaNdunankulu uNtuli.
Kuvela ukuthi uKhwela ubulawa nje, ubengezokulungenela ukhetho lukuba yikhansela ngomhla ka-4 kuLwezi (November), njengoba kuzokhethwa amakhansela. Ukubulawa kukaKhwela, nokukaMnu Dauglas “Mfene” Thusini, ongcwatshwe ngoMgqibelo, KwaMashu, obeyisishoshovu seMarch and March Movement, sekuphenywa uphiko, iPolitical Killings Task Team (PKTT).
Amakhansela abulawe komasipala kuleli hlandla eliqale ngo-2021, eThekwini angu-5, kanti eMngeni, eMkhambathini, naseNewcastle angu-2, umasipala ngamunye.
Abanye omasipala okubulawe emakhansela awo ngaso lesi sikhathi, ngowaseMsunduzi, eMzumbe, ebaQulusini, KwaNongoma, eMvoti nowaseMhlathuze.
