UMHLAZIYI wepolitiki ozinze e-University of KwaZulu-Natal, uMnu uZakhele Ndlovu, uthi zinhle impela izinhlelo zethimba le-ANC elijutshwe ukuvuselela le nhlangano KwaZulu-Natal naseGauteng, kodwa indlela okusafanele ihanjwe iwumqansa.
Izolo, ngoLwesine, uMnu uJeff Radebe, ohola leli thimba eKZN, wethule izinhlelo abanazo zokuvuselela uKhongolose eKZN, esithangamini abebenaso nabezindaba, eThekwini.
Phakathi kokunye uthe kuzoba khona izifundo ngenqubomgomo ye-ANC nokuziphatha kwamalungu ayo, ukuheha amalungu amasha, nokubuyisa amadala angayivotelanga ngoNhlaba (May) ka-2024. Uthe phezulu eqhulwini bazolwa nenkohlakalo nabantu abadala uqhekeko enhlanganweni.
Kuleli sonto, uMdidiyeli waleli thimba uMnu uMike Mabuyakhulu, uzoba nemihlangano nonobhala bezinhlaka ezingamadlela-ndawonye ne-ANC, okuyiSACP, iCOSATU neSANCO. UNdlovu uthi i-ANC mayikhohlwe ngokuthi kusekhona ukwesekwa eyophinde ikuthole kubantu abasha.
“Uma ubheka leli thimba le renewal, ngabantu asebebadala ngokweminyaka, futhi i-ANC iphelelwe ngamandla phambi kwabo, bekhona bengabaholi. Intsha ibuza ukuthi izovotelani ingasebenzi. Kubantu abasha besikhathi samanje, into ehamba phambili wukuzijabulisa, ngoba ukhwantalala oludalwa wukungasebenzi lubenza bagxile ezidakamizweni.
“Bona bangavotela inhlangano ezokhuluma ngokubanika umisebenzi. Intsha eNingizimu Afrika ayivoti, uMnu Julius Malema, ungufakazi walokho. I-EFF igcwalisa izinkundla uma kunamarali, kodwa uma sekuyovotwa, bancane abantu abayivotelayo, uma kuqhathaniswa nabebehambela amarali ayo.
“I-ANC kumele ikhumbule ukuthi abantu abebethembekile kuyona, kusukela ngo-1994, abasekho emhlabeni iningi labo – labo abebethi siyivotela le nhlangano ngoba yasikhulula engcindezelweni yamaBhunu. KwaZulu-Natal, kunale nto ebizwa ngokuthi ‘yiZuma factor’. Uma iMK Party isaholwa nguMnu uJacob Zuma, kuzoba lukhuni ukuthatha abantu baseKZN kuyo.
“Lokhu kwabonakala uZuma esenguMengameli we-ANC, abantu ababekade bevotela i-IFP, bajika bavotela i-ANC, hhayi ngoba behambisana nemigomo yayo, kodwa ngenxa yokuthi iholwa nguZuma nje. URadebe, uMabuyakhulu, noMnu u-Amos Masondo (eGauteng) sebebadala, futhi intsha ayibazi. Mkhulu umsebenzi okusafanele wenziwe,” kuhlaziya uMnu uNdlovu.
Uveze ukuthi ikhona ingcindezi efakwa wubuholi besigungu esiphezulu se-ANC, yokuthi kulungiswe uKhongolose eKZN naseGauteng, ngoba kulandwe izingwevu zakhona ukuthi ziqhube lo msebenzi ngaphansi komkhankaso i-ASIYE AKHAYA.
