INKOSI uMzamo Buthelezi, oyiSekela likaMengameli we-IFP, uthi uma i-IFP ne-ANC bengabuyisani, ngeke liye phambili leli zwe.
Ukusho lokhu embuthanweni we-IFP oqhubekayo oLundi namuhla, lapho kugujwa khona iminyaka ewu-50 yasungulwa i-IFP.
INkosi uButhelezi ikhuleke kubaholi be-IFP, wagcizelela ukuthi kuyadingeka ukuba kubuyiswane ngoba uqhekeko olwaba khona phakathi kwalawa maqembu lwavula amanxeba ajulile ebantwini.
Kuzokhumbuleka ukuthi kwachitheka igazi labantu abaningi ikakhulukazi KwaZulu-Natal eminyakeni edlule, ngesikhathi kulwa i-ANC ne-IFP.
INkosi uButhelezi ibalule ukuthi uMntwana waKwaPhindangene, iNkosi Mangosuthu Buthelezi, engumsunguli we-IFP, yakhothama ishabasheka ilwela ukuthi kube ukuthelelana amanzi phakathi kwalawa maqembu. Ithe kumele kuqhutshekwe nalowo msebenzi wokubuyisana.
