ISHAYE indesheni kubaholi bomdabu nezinhlaka zezokuphepha ukuba zibambe iqhaza ekufukulweni kwemfundo ezindaweni zasemakhaya iMeya yaseMnambithi, uMnu Zama Sibisi.
USibisi ubethula inkulumo emcimbini wokuklonyelisa abafundi nothisha abenze kahle kumatikuletsheni wanyakenye izolo ngoLwesibili. Unxuse amakhosi nezinduna ukuba bakhulumisane nemindeni nemiphakathi ukuba ingayihleli imicimbi nemibuthano okudingeka ukuba ihanjelwe ngabafundi bakamatikuletsheni.Â
“Uqala nje unyaka, ngiyakhuleka kubaholi emiphakathini ukuba sibambisane sonke silwele imfundo yezingane zethu. Nginxusa nabazali emakhaya ukuba bangazivumeli izingane zabo ukuthi zibe wumvanzi, zihambele nemicimbi, bese zikhohlwa yizincwadi zesikole.
“Isifiso sami wukuba kubuye isithunzi semfundo, izimpi zezigodi zingakapakeli ezikoleni. Noma kwenzekile kwaxabana abafundi esikoleni, abazali kufanele bangenelele ngokuxazulula, hhayi ukuthatha uhlangothi. Okwethu siwumasipala wukuba sixhase izingane zethu ngemali yokubhalisa ezikhungweni zemfundo ephakeme kanye nangezinye izinsiza ezidingekayo,” kusho Sibisi.Â
Lo mcimbi ubuhanjelwe ngabaholi bemikhakha eyahlukene okubalwa kubona noMnu Velenkosini Hlabisa, onguNgqongqoshe wezokuBusa ngokuBambisana nezoMdabu kuzwelonke, obuye abe ngumongameli we-IFP.
UHlabisa wethule inkulumo yosuku okuyilapho khona encome amantombazane ngokuhamba phambili ekuthuthukisweni kwamakhaya, uma esethole imisebenzi.
