KUBHEKWE uBayanda Walaza ukuba aqhubeke ne-form yakhe enhle njengoba ezokube eyingxenye ye-Athletics South Africa (ASA) Age Groups (14-18) Championships ehlanganise no-U/23 eqale ngoLwesine kuze kube yiSonto eGreen Point Stadium, eCape Town.
UBayanda usematheni kulezi zinsuku njengoba esanda kwenza irekhodi elisha lakukeli lamajuniya. Uqophe isikhathi esiwu-9.99sec kwi-100m waphinde wabeka u-20.08sec kwi-200m egijima kwiGauteng North Athletics (GNA) nakwi-ASA Grand Prix Series ngokwehlukana.
Lezi zikhathi zifaka lo msubathi (uBayanda) emidlalweni yeWorld Athletics Championships ezokuba ngoSeptember eChina.
Isikhathi sabesilisa se-100m wu-10.00 kanti ese-200m wu-20.16.
UBayanda uzokuya eChina esenaso isipiliyoni njengoba nyakenye iqembu ayehamba nalo lahlomulela iNingizimu Afrika indondo yesiliva kwi-4x100m emidlalweni yama-Olympic Games eyayibanjelwe eParis, eFrance.
Leli qembu lalakhiwe ngu-Akani Simbine osanda kubuya nendondo yethusi kumaWorld Indoor Championships ngeledlule eChina, nguBradley Nkoana noShaun Maswanganyi.
Ukuba sefomoni kwabasubathi baseNingizimu Afrika kuzokwenza i-ASA iphathwe yikhanda uma isiqoka isikwati esiya kumaWorld Championships.
Omunye wabadlali ababhekiwe kulo mqhudelwano wangempelasonto nguLythe Pillay. IKwaZulu-Natal Athletics (KZNA) izokube imelwe ngabasubathi abawu-54 kulo mqhudelwano.
