KULINDELEKE kuphinde kuhlehliswe ukulalelwa kwecala elithinta owayengungqongqoshe wezempilo uDkt Zweli Mkhize nethenda eyanikwa inkampani iDigital Vibes, eyanyaniswa nabantu abasondelene naye.
Ngo-2021 umnyango wanika inkampani iDigital Vibes ithenda ka-R15 million yemikhankaso yokuqwashisa ngobhubhane iCovid-19 nokufundisa ngeNational Health Insurance (NHI). ISpecial Investigating Unit (SIU) ithi le nkampani yanikwa le thenda ngendlela engafanele futhi yayingawulungele lo msebenzi.
Phambilini kwakulindelwe ukuthi leli cala liqale ukuqulwa ngomhla ka-11 no-12 ku-August. I-SIU kuleli sonto inikwe imvume yokuletha obunye ubufakazi okuthiwa bugxibha namanye amalungu omndeni kaMkhize, abengavelanga ebufakazini obethulwe ngaphambilini. Ithi inobufakazi bokuthi kwasetshenziswa le thenda ukushushumbisa imali nokwenza inkohlakalo.
UMnu Kaizer Kganyago, okhulumela iSIU, uthi uphenyo lwabo luveze ukuthi kunabanye abantu nezinkampani ezahlomula kule thenda, bakhokhelwa bengenzanga msebenzi.
“Ukuze sikwazi ukubafaka kulolu daba, bekufanele senze i-affidavit, sicele iSpecial Tribunal ukuthi isivumele siyifake ebufakazini bethu. Lokhu kuzosinika igunya lokuveza laba bantu futhi sikwazi nokulandelela ukuba ibuyiswe le mali uma le thenda ihoxiswa,” esho.
Udaba lweDigital Vibes lube yifu elimnyama kuMkhize njengoba kwaze kwaphoqeleka ukuthi uMengameli Cyril Ramaphosa amnike ikhefu elikhethekile ukuze abhekane nalezi zinsolo.
