KUBHUNGWE kabanzi izinkinga namasu okubhekana nezinhlekelele ezidalwa wukuguquguquka kwesimo sezulu KwaZulu-Natal.
Umkhandlu owaqokelwa ukululeka ukuthi kungabhekanwa kanjani nesimo sezulu – esidlula nemiphefumulo yabantu, sicekele phansi nengqalasizinda – elihlanganise osolwazi, abacwaningi nabeluleki bezomnotho, belihlangene emahhovisi kahulumeni eMayville, eThekwini kudingidwa lolu daba.
Lo mhlangano uqalwe ngoLwesihlanu waphethwa ngoMgqibelo. Ikhabhinethi kandunankulu wesifundazwe, uMnu Thami Ntuli, ibihambisana naye kulo mhlangano.
“Sesithule umkhandlu ozosicebisa ukuthi singabhekana kanjani nenkinga yokuguquguquka kwesimo sezulu, ukuze uma sibhekana naso, sibenendlela yokuvikela umnotho nengqalasizinda.
“Siphila esikhathini esinzima kakhulu sokuhlaselwa wukuguquguquka kwesimo sezulu, lapho kudaleka izinhlekelele, kufe nabantu. Nomnotho uyashayeka uma sesilinyalelwa yingqalasizinda,” kusho uNtuli.
Uthe maningi amazwe abhekene nale nkinga.
“Umengameli wezwe (uMnu Cyril Ramaphosa) naye useyisungulile ikhomishini ebhekelele isimo sokuguquguquka kwesimo sezulu. Lo mhlangano wethu sifuna uqhamuke nezixazululo zokuthi singayithathaphi imali yokuxhasa izinhlelo zokulwa nokuguquguquka kwesimo sezulu.
“Njengamanje siphezu kwamaqhinga okuthi sizolwa kanjani nale nkinga,” kusho uNtuli.
Uveze ukuthi lo mhlangano ulungiselela imbizo yamazwe, okuzobhungwa kuyona ngale nkinga. Osolwazi basezikhungweni zemfundo – okubalwa i-University of KwaZulu-Natal, iMangosuthu University of Technology ne-University of Wirwatersrand – bebeyingxenye yokwethula ucwaningo ngalesi simo sokuguquguquka kwesimo sezulu.
Bekukhona nabehhovisi likaMengameli Ramaphosa.
