AKAKHOLWA wukuthi usinde kanjani umculi kamaskandi engozini yemoto eyenzeke ehamba namagidangoma akhe.
ULusanda “iBhova Elincane” Khumalo, oyindodana kaMgqumeni, “iBhova LikaDikadika” Khumalo (ongasekho), ugingqike nemoto ngoMgqibelo, eMthunzini, eya kwiNdoni Saliwa Maskandi Festival, eDondotha, eMpangeni.
Kule ngozi eyenzeke ngo-23h00 ebusuku, kuthiwa imoto iphenduke yabheka phezulu ngamasondo. Kubikwa ukuthi bebebathathu phakathi, okuthe emuva kwengozi, baphuthunyiswa esibhedlela eNgwelezane.
Ngokusho kukaLusanda engxoxweni yakhe neLANGA, uthi ubezama ukudlula iloli, imoto abehamba ngayo yadonswa ngamanzi.
“Kuthe uma ngizama ukudlula iloli, kanti kunomgodi onamanzi engene kuwona imoto. Ngithe uma ngiyilawula, yafuna ukuphonseka elolini ngohlangothi, okuyilapho-ke ingalawulekanga khona, yaphenduka yabheka phezulu,” kusho uLusanda.
Uthi namanje ubonga umusa kaNkulunkulu ngoba bekunzima. Uveze ukuthi imoto iphenduke yaphonseka emzileni wezimoto ebeziphambana naye, kodwa ngenhlanhla, kayikho imoto ebiqhamuka kulowo layini.
“Cishe safa sonke, kodwa-ke esibhedlela basilekelelile,” esho.
Uthi ngenxa yokulimala kwabo, bangeniswa esibhedlela, kabafinyelelanga eDondotha, eMpangeni.
