Ilanga News
Home 9 Izindaba 9 UNgizwe usephenduke “umgodi onganukwanja” emicimbi yesizwe

UNgizwe usephenduke “umgodi onganukwanja” emicimbi yesizwe

by | 10 November 2024

JOHN HLONGWA
noPhumlani Gama 

USEPHENDUKE umgodi onganukwanja umdidiyeli wamabhinca, uNgizwe Mchunu njengoba abadidiyeli bamabutho kaZulu sebenqume ukuba angaphinde alubhade emikhosini yeSilo uMisuzulu namakhosi kuze kube ulungisa inkulumo yakhe enenhlabathi, ayinameke ezinkundleni zokuxhumana. 

UNgizwe ukhwele wadilika emakhosini – ezinkundleni zokuxhumana – ewasola ngokuthi ahlatshiswa ngezinkomo ezibizwa ngethanga (isipho esisuke siphiwa inkosi), uwasole nangokweqisa emankwebevini. Le nkulumo imdonsele amanzi ngomsele njengoba exoshiwe emicimbini emibili esikhathini esingaphansi kwesonto. 

NgeSonto uxoshwe ebukhosini bakwaZungu, KwaMadlebe, eMpangeni, lapho indodakazi yeNkosi uZenzo Zungu ibikhehlwa yiNkosi yaseMacambini, uMthokozisi Mathaba. NgoLwesine uxoshwe  emcimbini wokwembulwa komfuziselo weSilo uShaka, esikhumulweni sezindiza, iKing Shaka. 

UNGIZWE eguqe phambi kweNkosi uZenzo Zungu.

Umdidiyeli wamabutho, uMnu Sipho Mhlongo, utshele ILANGA Lempelasonto ukuthi kawukho umgqomo wokulahla umuntu. “Empeleni uNgizwe kasimxoshi emicimbini yesizwe, kodwa sifisa axolise ngenkulumo ayibhekise emakhosini.  Le nkulumo kayehlanga kahle kubadidiyeli bamabutho. Kasikwazi ukuhlala naye kule micimbi ekubeni ethuke amakhosi. Makaxolise ukuze impilo iqhubeke.  

“Lo muntu uhlonishwe yiNgonyama ngesikhundla esikhulu, ngakho kumele ahloniphe,” kusho umdidiyeli. 

Umdidiyeli wamabutho aseKing Cetshwayo uMnu Senziwanjani Xulu, obonakala kwi-video egxavuna uNgizwe ngengalo, uthi inkinga kaMchunu wukungahloniphi. “UMchunu uphethwe yimi la eKing Cetshwayo, abantu bayangibuza ukuthi ngithule ngithini uma ethuka amakhosi ngale ndlela. UNgizwe uyaziwa ukuthi unabantu abamlandelayo, ngisho iNgonyama imkhonzile, yaze yamnika isikhundla kodwa inkinga yakhe akahloniphi. 

“Emcimbini obuseKing Shaka ngoLwesine sivumelene nabadidiyeli ukuthi makahambe ngoba besiyizwa imvunge yamabutho ukuthi akaphephile, afuna ajeze ngenkulumo yakhe, yingakho ngicele amaphoyisa ukuba amkhiphe,” kusho uXulu. 

Okhulumela iSilo, uMntwana uSimphiwe Zulu, uthe bayalwazi lolu daba futhi basezinhlelweni zokuhlela umhlangano ukuze ludingidwe. 

Ethintwa uMchunu, ushaye ngamafuphi wathi akakhulumi namaphephandaba. Kwale noma esethintwa okwesibili waqhubeka nakusho ekuqaleni. 

Ezisematheni

Kwethule uhlelo lwabokufika ukufaka izicelo zokubhaciswa online

Kwethule uhlelo lwabokufika ukufaka izicelo zokubhaciswa online

UMNYANGO wezaseKhaya eNingizimu Afrika wethule uhlelo lokuthi abokufika, abafuna ukukhoseliswa kuleli zwe, bafake izicelo zabo ngohlelo lwe-inthanethi (online). UNgqongqoshe walo mnyango, uDkt Leon Schreiber, nguyena osayine ukuphasiswa kwalolu hlelo ePretria...

Kukhalwa ngobuncane bemali eyabelwa othisha bakwaGrade R

Kukhalwa ngobuncane bemali eyabelwa othisha bakwaGrade R

UMNYANGO weMfundo eyiSisekelo eNingizimu Afrika usutshele amalungu ePhalamende ukuthi incane kakhulu imali eyabelwe ukuholela othisha bakwaGrade R. Besekunesikhathi eside kukhalwa ngokuthi othisha bakwaGrade R kababhekelelwa, njengoba abanye bebevolontiya isikhathi...

Liyaqala ukuqulwa elokubulawa kukaMagaqa

Liyaqala ukuqulwa elokubulawa kukaMagaqa

LIYAQALA ukuqulwa ngoMsombuluko eNkantolo eNkulu yaseMgungundlovu icala lokubulala elibhekene nabesilisa abathathu abasolwa ngokubulawa kowayenguNobhala wentsha ye-ANC, uMnu Sindiso Jethro Magaqa ngo-2017. Abasolwa uMnu Mbulelo Mpofana, uMnu Sbonelo Myeza noMnu...