INTATHELI YELANGA
KUBONGWE isikhulu seRichards Bay FC, uSifiso”Jomo” Biyela, ngokutakula iPrince Mangosuthu Legacy Cup 2025 ngemizuzu yokugcina, sivuma ukuba ezaso zibe yingxenye yalo mqhudelwano, emuva kokuba kuhoxe iKaizer Chiefs.
Lo mqhudelwano wokuhlonipha iNkosi Mangosuthu Buthelezi (engasekho), uzogijinywa ePrince Mangosuthu Regional Stadium, oNdini ngoMgqibelo.
Ngokusho kukaMasipala waseZululand, iChiefs ithumele incwadi esayinwe ngusihlalo wayo, uKaizer Motaung, ethi le kilabhu icela ukuhoxa kwazise iyingxenye yemidlalo yeCaf Confederation Cup. Ngokwencwadi, uMotaung uthe: “Lesi sinqumo esinzima sisithathe ngenxa yezinguquko ekhalendeni lemidlalo yethu yangaphandle, emuva kokuphuma kohlu lokuqhathwa kwamakilabhu azodlala esigabeni samaqoqo.
“Lokhu-ke kudale ukuba kushintshe izinhlelo zethu, zashayisana nesifiso sethu sokubamba iqhaza kulo mqhudelwano (Legacy Cup). Njengekilabhu enomlando ononile e-Afrika, kumele sikhombise ukuzinikela emiqhudelwaneni yeCaf.”
IMeya yaseZululand, uMichael Khumalo, ithe yize bedumele ngokuhoxa kweChiefs – okungabuzwa ukuthi ibizoheha izinkumbi zabalandeli – kodwa kumele nakanjani abantu baseZululand bayibone iPrince Mangosthu Legacy Cup 2025.
“Ngithanda ukubonga uSihlalo weRichards Bay FC, uSifiso Biyela, ngokwamukela isicelo sethu, sokuthi ikilabhu yakhe ibe yingxenye yomqhudelwano wanonyaka. Ukuseseka kwakhe kuqinisekisa ukuthi siyaqhubeka nokuhlonipha nokuqhakambisa ifagugugu loMntwana uMangosuthu Buthelezi, futhi sibe siqinisekisa nokuthi lo mqhudelwano uba sezingeni eliphezulu,” kusho uKhumalo.
Abathandi beChiefs abesebethenge amathikithi alo mqhudelwano – ovikelwa yiNsingizi Hotspurs yaseSwazini – ngethemba lokubona amaqhawe abo, bazobuyiselwa imali yabo eTicketpro uma kuwukuthi bayayifuna.
Aqhathwe kanje amakilabhu kwiPrince Mangosuthu Legacy Cup:-
AmaZulu FC vs Njampela FC 09:00.
Nsingizi vs Njampela 12:00
Owamanqamu ungo-16:00
