KONKE sekumi ngomumo ngomcimbi wezithandani i-Lover And Friends ozoba seYadini Lounge ngoMgqibelo ngomhla ka-15 kuFebruary 2025.
Lo mcimbi obhekwe ngabomvu kulindeleke ukuthi uhehe inqwaba yabantu abasothandweni nalabo abangekho othandweni kodwa abazimisele ukuzothokoza.
Kulo mcimbi kuboshelwe abaculi noDJ okubalwa kubo uGatsheni, Zandie Khumalo, Jumbo, Zakwe, Q Twins ne-Afrosoul uCollen Zondo, Jnr Richi, DJ Muntu, DJ Fox, DJ Afro noDJ Makhe njengoba kubaphathi bohlelo kukhona uFlymotion, Tha Simelane, Jadu noSimphiwe Shembe.
Phambilini umhleli walo mcimbi uSibusiso Gumede uveze ukuthi umcimbi wangoMgqibelo uzobe kungowokuzwa amanzi ngobhoko njengoba omkhulu uza ngasekupheleni konyaka.
Uthe kulona wangoMgqibelo kusayisiqalo njengoba sekuphele iminyaka emine lo mcimbi ungenzeki.
Kuzokhumbuleka ukuthi lo mcimbi wagcina uwenzeka ngo-2019 lapho kwakukhona nesihlabani saphesheya kwezilwandle uSyleena Johnson.
UGumede unxuse wonke umuntu aphume ngobuningi ukuzojabulsa ngoMgqibelo njengoba ubumnandi buzobe buchithiwe ngezindlela ezahlukene.
Amathikithi alo mcimbi ayatholakala eWebtickets ngo-R100 njengoba esangweni ezotholakala ngo-R200.
Akhona awezicukuthwane abiza uR500 njengoba etholakala eWebtickets kuphela.
