UZOQHUBEKA ngaphandle kwamanye amalungu omndeni umcimbi wokuhlonipha umsunguli weqembu lodumo iLadysmith Black Mambazi uJoseph Shabalala ozoba seThe Playhouse eThekwini ngoLwesithathu mhla ka-24 kwephezulu. Lo mcimbi obizwa nge-African Icons Tribute Honoring Dr Joseph Shabalala uhlelwa yinkakha yomculo uLebo M ngokubambisana nendodana kaShabalala endala uNkosinathi. Ngeledlule ILANGA libike ngokudunguza ebumnyameni kweLadysmith Black Mambazo ngomcimbi wokuhlonipha umsunguli. Leli phephandaba lithole ukuthi leli qembu kanjani nenhlangano eyengamele okuthinta uShabalala okubalwa nonkosikazi wakhe kabazi lutho ngalo mcimbi. NgoMgqibelo lo mcimbi wethulwe ngokusemthethweni emcimbini obuseBallito obuhanjelwe izicukuthwane nosaziwayo.
Kulo mcimbi uLebo M uveze ukuthi balandele yonke imigudu efanele ngalo mcimbi ingakho bebambisene noNkosinathi. ULebo M uphinde wethula ngokusemthethweni ingoma ayididiyelile ehlanganisa yena noNkosinathi kanjalo noBig Zulu, Mnqobi Yazo, Thobani Nzuza nendodakazi yakhe Refilwe esihloko sithi Imisebenzi. UNkosinathi utshele leli phephandaba ukuthi kungamampunge ukuthi awathintwanga amanye amalungu alo mndeni, uthe bonke abafanele bathintiwe okubalwa nalo iqembu likayise iLadysmith Black Mambazo. UXolani Majozi ophethe izindaba zeLadysmith Black Mambazo uthe leli qembu ngeke libe yingxenye yalo mcimbi. Uthe ngeke akwazi ukuphawula ngokuthinta amalungu omndeni ngoba akagunyaziwe. Isitatimende esikhishwe inhlangano kaShabalala iJoseph Shabalala Foundation iziqhelelanisile ngalo mcimbi yaveza nokuthi ngakho ngeke bazihlanganise nawo. Ngakolunye uhlangothi umcimbi kulindeleke uqhubeke ngoLwesithathu njengoba kuboshelwe abaculi okubalwa kubo uKhuzani, Big Zulu, Mnqobi Yazo, Phila Dlozi, Boity, Naim Kay, Blaq Diamond, Thee Legacy nabanye. Abaphathi bohlelo uPalesa Tembe, Tshatha Ngobe noMinnie Dlamini.
