KUBOSHWE abasolwa abangaphezu kuka-13 000 eNingizimu Afrika ngesonto lokuqala ku-2025. Lokhu kuvezwe wumbiko wamaphoyisa, owethulwe yihhovisi loMkhuzi wawo kuzwelonke, uGen Fannie Masemola.
Ngokusho komkhulumeli wamaphoyisa kuzwelonke, uLt-Col Vincent Mukhathi, kusuka ngomhla ka-30 kuZibandlela (December) kuya kumhla ka-5 kuMasingana (January) kuboshwe abasolwa abangu-13 105 ezweni lonke, ngaphansi kohlelo lwamaphoyisa i-Operation Shanela.
UMukhathi uthi kulaba ababoshiwe, abangu-1743 bebefunelwa amacala abucayi.
“Abasolwa ababoshiwe bebefunelwa amacala okubalwa kuwona awokubulala, awokuzama ukubulala, awokudlwengula nawokubamba inkunzi kuhlonyiwe. Abalinganiselwa ku-142 bebefunelwa ukubulala, abawu-81 kulaba ngabase Eastern Cape.
“Abawu-241 bebefunelwa ukuzama ukubulala nokudlwengula, babangu-119 kulabo ngabase-KZN, kanye nabawu-126 abatholakale nezibhamu ezingekho emthethweni, khona eKZN,” esho.
Uthi abangaphezu kuka-3000 baboshelwe amacala okushaya ngenhloso yokulimaza, ukuthengisa izidakamizwa nokutholakala nazo.
Abasalanga ngaphandle nabokufika abangenawo amaphepha okuba kuleli njengoba kuboshwe abangaphezu kuka-1160, kanjalo nabebeshayela bephuzile njengoba kuboshwe abalinganiselwa ku-900.
UMukhathi uthi amaphoyisa azoqhubeka nokusebenza ngokuzimisela ukuqinisekisa ukuthi izakhamizi zakuleli nezivakashi ziphephile.
