KUBOSHWE abayisikhombisa okubalwa kubo nabakufika abakuleli ngokungekho emthethweni kwisivimbamgwaqo sokuqikelela ukuphepha kulesi sikhathi sePhasika eMtubatuba.
Lesi sivimbamgwaqo ebesisemgaqweni onguthelawayeka u-N2 besiholwa yiMeya kaMasipala Inkosi uMtubatuba, uMnu Mxolisi Mthethwa, ngokubambisana nezikhulu zamaphoyisa, nezisebenzi zoMnyango wezaseKhaya. Bekuhloswe ngaso ukukhuthaza abashayeli ukuba bahambe ngokucophelela, bagcine imithetho yomgwaqo.
Usuku lugoqwe ngokukhishwa kwamathikithi okungayigcini imithetho yomgwaqo awu-45, kwaboshwa abokufika abakuleli ngokungemthetho abawu-5 kanye nababili abebeshayela bephuze beqisa ezinkambeni zikaFaro.
UMthethwa ube esexoxisana nabagibeli, wapha nezingane amaswidi ngesikhathi ehlola ukuthi izimoto kazilayishile yini ngokweqile.
“Lesi yisikhathi esibi kakhulu ngoba bonke abantu balibangise emakhaya nasezinkonzweni, ngakho-ke sibone kubalulekile ukuthi sizoqwashisa abashayeli ukuba bashayele ngokucophelela. Kubalulekile ukubekezelelana kulesi sikhathi samanje esijwayele ukuba nezingozi eziningi,” esho.
Ushayele ihlombe abezokuphepha abebengagayelwe mphako ngokuqinisekisa ukuthi abagibeli nabashayeli baphephile.
