KUBALWA nabefundisi kubantu ababoshelwe amacala okwephula imthetho yemigwaqo yakuleli ngempelasonto. NgoLwesihlanu ebusuku kuze kube wuMgqibelo ngezithuba zasekuseni, uNgqongqoshe wezokuThutha nokuHlaliswa KwaBantu KwaZulu-Natal uMnu Siboniso Duma, ngokubambisana nozakwabo emkhakheni wezokuphepha, benze isivimba-mgwaqo emgwaqweni owuthelawayeka uN2, eMpangeni.
Ngesikhathi kuqhutshwa lo mkhankaso, kubanjwe abantu abaningi abebenza okuphambene nomthetho olawula ukusebenza nokusetshenziswa kwemigwaqo yakuleli. Kuphinde kwashaqwa nabantu abawu-15, okutholakale ukuthi bakuleli ngokungemthetho.
Lona wumkhankaso oqhutshwa kusetshenziswa itemu lomnyango wezokuthutha elithi, #NenzaniLaEzweni, okuhloswe ngawo ukukhuculula okungahambi kahle emigwaqweni yesifundazwe. Bonke okutholakale ukuthi kabanawo amaphepha abagunyaza ukuba kuleli, bagcinwe esitokisini saseMgungundlovu.
Ngokwesitatimende esikhishwe yilo mnyango, phakathi kwababoshiwe abawu-113, kukhona abashayeli bamaloli, udokotela, iphoyisa, abezicishamlilo, abefundisi, othisha ababili, nomfundi oboshelwe icala lokushaya iphoyisa. Kuphinde kwakhishwa amathikithi awu-80 abhekiswe kubantu abephule imithetho yokuhamba ngesivinini esibekiwe.
Ngesivinini sisodwa nje, lo mnyango uphumelele ukuqoqa imali elinganiselwa ku-R40 000.
“Kule mikhankaso umnyango usebenzisana nokhomishana wamaphoyisa kulesi sifundazwe, namaphoyisa. Sithanda ukubexwayisa abashayeli ukugwema ukushayela bephuzile. Sinxusa umphakathi ukubambisana nathi, ukuqinisekisa ukuthi wonke umuntu uphephile. Yisikhathi esibucayi lesi.
“Sibonga ukusebenza ngokubambisana nabezempilo abebephe-the imishini yokuhlola izinga lotshwala emzimbeni womshayeli wemoto ngayinye,” kusho uMnu Ndabezinhle Sibiya, okhulumela umnyango.
