KUBOSHWE omunye umsolwa ngesigameko sokudutshulwa kubulawe abantu abawu-18 eLusikisiki e-Eastern Cape esenzeka ngoSeptember nyakenye.
Ngokubika kw-eNCA lo msolwa oneminyaka ewu-20 ubudala uboshwe ngeSonto ntambama ithimba lophiko lweProvincial Serious an Violent Crimes.
Okhulumela amaphoyisa ase-Eastern Cape uLieutenant-Colonel Siphokazi Mawisa uthe lolu phiko lulandele umkhondo webhasi ebilibangise eCape Town lisuka esiteshini samabhasi eKing William’s Town.
Amaphoyisa athe elisesha leli bhasi afica umsolwa aphakathi kulona wabe esekhalelwa ngamasongo kaSgonyela ngokusho kukaMawisa.
Umsolwa kulindeleke ukuth athweswe amacala ngokusemthethweni njengoba kulindeleke ukuba avele enkantolo maduze. Babalelwa ku-7 abasolwa asebeboshiwe kulesi sigameko esathusa abaningi eNingizimu Afrika.
Babhekene namacala awu-18 okubulala nokuphatha izibhamu ezingekho emthethweni nezinhlamvu.
