UKHALELWE ngamasongo kaS’gonyela umlisa odabuka eSwazini, oyanyaniswa namacala okudubula kubulawe abayisithupha kwa-V, eMlazi, eThekwini, ngomhla ka-24 kuNcwaba (August) nyakenye.
UMelusi Dlamini (28) uvele kafushane eNkantolo yaseMlazi ngemuva kokuba eshaqwe ngamaphoyisa esebalekele eKrugersdorp, eGauteng.
Kuthiwa kwenzeka lesi sigameko emuva kokuba kuqubuke ingxabano phakathi kwabasolwa nabafi kubangwa ukukhulunywa kwezilimi. Kwakubangwa ukuthi abanye bakhuluma isiZulu, abanye bakhuluma isiXhosa kanti kunabanye abakhuluma isiSwati.
Okhulumela amaphoyisa KwaZulu-Natal, uLt-Col Robert Netshiunda uthe umsolwa wenqabile ukufaka isicelo sokudedelwa ngebheyili.
“Ngosuku lwesigameko, abesilisa nabesifazane babezihlalele kuphuzwa. Kwathi besahleli kwafika abasolwa ababili bacela ukuthengiselwa ugwayi, kodwa batshelwa ukuthi kawuthengiswa, bayalelwa ukuba bahambe. Emuva kwesikhashana behambile, babuya osebephethe izibhamu bayalela abesifazane abathathu ukuba balale phansi, emuva kwalokho baqala ukudubula.
“Abafi bashonela endaweni yesigameko. Umsolwa ubekwe amacala ayisithuba okubulala, ukuphatha isibhamu esingekho emthethweni kanye nezinhlamvu. Uvelile enkantolo, icala lahlehliselwe inyanga ezayo,” kusho uNetshiunda.
